„ჯონსთაუნი“: რეალური ისტორია, რომელიც საშინელებათა ფილმის სცენარს გავს

1978 წლის 18 ნოემბერი, გაიანას გაუვალი ჯუნგლები, სამხრეთ ამერიკა. ადგილი, რომელსაც „ჯონსთაუნი“ ერქვა, რუკაზე სამოთხედ იყო მონიშნული, სადაც ადამიანებს რასობრივი თანასწორობისა და მშვიდობისთვის უნდა ეცხოვრათ. სინამდვილეში კი ეს იყო საკონცენტრაციო ბანაკი ეკლიანი მავთულებით, რომელსაც ფსიქოპათი ლიდერი, ჯიმ ჯონსი მართავდა. იმ დღეს, იქ დატრიალდა თანამედროვე ისტორიის ყველაზე მასშტაბური და შემზარავი კოლექტიური თვითმკვლელობა, რომელმაც 900-ზე მეტი ადამიანის სიცოცხლე შეიწირა.

ყველაფერი დაიწყო იმით, რომ აშშ-ის კონგრესმენი ლეო რაიანი ჯონსთაუნში ჩავიდა, რათა შეემოწმებინა ინფორმაცია ადამიანების იძულებით დაკავებაზე. რამდენიმე წევრმა მასთან ერთად გაქცევა მოინდომა. როდესაც ისინი აეროდრომზე თვითმფრინავში სხდებოდნენ, ჯიმ ჯონსის დაცვამ ცეცხლი გახსნა და კონგრესმენი და რამდენიმე ჟურნალისტები ადგილზევე ჩაცხრილა. ჯონსმა იცოდა, რომ ამის შემდეგ ამერიკის მთავრობა მას თავს არ დაანებებდა, ამიტომ მან აამუშავა გეგმა, რომელსაც წლების განმავლობაში ამზადებდა — „რევოლუციური თვითმკვლელობა“.

მან მთავარ პავილიონში შეკრიბა სექტის ყველა წევრი. შუაში იდგა ლითონის უზარმაზარი ავზები, სავსე ყურძნის არომატიანი ხილის სასმელით (Flavor Aid), რომელშიც სასიკვდილო დოზით იყო გარეული ციანიდი და ვალიუმი (დამამშვიდებელი). ჯონსმა მიკროფონში გამოაცხადა: „ჩვენ არ ვიკლავთ თავს, ჩვენ ჩავდივართ რევოლუციურ აქტს არაადამიანური სამყაროს წინააღმდეგ“.

ამ ღამის ყველაზე საზარელი ნაწილი ის იყო, რომ ჯონსმა ბრძანა, ჯერ ბავშვები მოეკლათ. მან იცოდა, რომ თუ ბავშვები მოკვდებოდნენ, მშობლებს სიცოცხლის სურვილი აღარ ექნებოდათ. მედდები შპრიცებით პირდაპირ პირში ასხამდნენ ციანიდს ჩვილებსა და მცირეწლოვან ბავშვებს. 5 წუთში ბავშვებმა კრუნჩხვები და პირიდან ქაფის გადმოშვება დაიწყეს. პავილიონი დედების კივილმა მოიცვა, მაგრამ შეიარაღებული დაცვა არავის აძლევდა გაქცევის საშუალებას. ჯონსი კი ყვიროდა: „შეწყვიტეთ ისტერიკა! მოკვდით ღირსეულად! უბრალოდ დაწექით და დაიძინეთ!“.

როდესაც შვილები თვალწინ მოუკვდათ, მშობლებმა მორჩილად, ზოგმა კი ძალდატანებით, დალიეს შხამი. ისინი ოჯახებით წვებოდნენ ერთმანეთის გვერდით, ეხუტებოდნენ უკვე გარდაცვლილ ბავშვებს და ელოდებოდნენ აღსასრულს. 45 წუთში ყველაფერი დასრულდა. ჯუნგლებში სამარისებული სიჩუმე ჩამოწვა.

მეორე დილით, როდესაც გაიანის ჯარი ტერიტორიაზე შევიდა, მათ დახვდათ აპოკალიფსური სურათი: მინდორი ფერადი ტანსაცმლით იყო მოფენილი. 918 გვამი (მათ შორის 304 ბავშვი) ეყარა მიწაზე, უმეტესობა პირქვე, ჩახუტებულ პოზაში. ჰაერში ნუშის მწარე სუნი იდგა (ციანიდის დამახასიათებელი სუნი). თავად ჯიმ ჯონსი არ მომკვდარა შხამით — მან სიმხდალე გამოიჩინა და თავი პისტოლეტით მოიკლა, რათა ტანჯვა აეცილებინა.

ამ სასაკლაოს ჰყავდა ერთი უნებლიე და ყველაზე ტრაგიკული გადარჩენილი — 76 წლის ჰაიასინთ თრეში. მას ეძინა თავის ქოხში და განგაშის ხმა ვერ გაიგო. როდესაც დილით გაიღვიძა და გარეთ გამოვიდა, დაინახა, რომ მთელი მისი სამყარო, ყველა მეგობარი და ნათესავი მკვდარი იყო. ის დადიოდა გვამებს შორის, ეძებდა ცოცხლებს, მაგრამ პასუხს მხოლოდ თუთიყუშები და მაიმუნები სცემდნენ.