სამხედრო ოპერაცია კოდური სახელწოდებით „პოლ ბანიანი“

1976 წლის 21 აგვისტოს, კორეის დემილიტარიზებულ ზონაში (DMZ) განხორციელდა სამხედრო ოპერაცია კოდური სახელწოდებით „პოლ ბანიანი“ (Operation Paul Bunyan), რომელიც ისტორიაში შევიდა როგორც ყველაზე ძვირადღირებული და მასშტაბური „მებაღეობის სამუშაო“. ეს იყო მომენტი, როდესაც ერთი ხის მოჭრის გამო მსოფლიო მესამე მსოფლიო ომის ზღვარზე აღმოჩნდა.

კონფლიქტი დაიწყო სამი დღით ადრე, 18 აგვისტოს, როდესაც ორმა ამერიკელმა ოფიცერმა და სამხრეთ კორეელმა ჯარისკაცებმა გადაწყვიტეს მოეჭრათ 30 მეტრიანი ვერხვი, რომელიც გაეროს სადამკვირვებლო პუნქტის ხედვას ბლოკავდა. ეს რუტინული სამუშაო იყო, მაგრამ ჩრდილოეთ კორეელი ჯარისკაცები ადგილზე მივიდნენ, ხის მოჭრა გააპროტესტეს (მათი თქმით, ხე პირადად კიმ ირ სენმა დარგო) და მოულოდნელად ამერიკელებს თავს დაესხნენ. მათ ცულებითა და ხელკეტებით ორი ამერიკელი ოფიცერი ადგილზე მოკლეს.

აშშ-ის პასუხი იყო მყისიერი და დემონსტრაციული ძალის ისეთი ჩვენება, როგორიც რეგიონს კორეის ომის შემდეგ არ ენახა.

21 აგვისტოს დილას, იმავე ხის მოსაჭრელად (უფრო სწორად, გასაკაფავად) ადგილზე მივიდა კოლონა, რომლის შემადგენლობაშიც შედიოდა: 23 ამერიკული და სამხრეთ კორეული მანქანა, 813 ჯარისკაცი, სრულად აღჭურვილი სპეცრაზმი და ინჟინერთა კორპუსი ჯაჭვური ხერხებით.

მაგრამ ეს მხოლოდ აისბერგის მწვერვალი იყო. მათ ზურგს უმაგრებდნენ:
🔸 27 ამერიკული შვეულმფრენი, რომლებიც თავზე დაფრინავდნენ;
🔸 B-52 ტიპის ბირთვული ბომბდამშენები, რომლებიც საჰაერო სივრცეში პატრულირებდნენ;
🔸 F-111 ტიპის გამანადგურებლები;
🔸 ავიამზიდი “USS Midway”, რომელიც მთელი თავისი დამრტყმელი ჯგუფით კორეის სანაპიროსთან მივიდა;
🔸 და რაც ყველაზე საშიში იყო — სამხრეთ კორეის სპეცრაზმელები, რომლებსაც ტანსაცმლის ქვეშ სხეულზე “კლეიმორის” ტიპის ნაღმები ჰქონდათ მიმაგრებული და ჩრდილოეთ კორეელებს გამომწვევად უყვიროდნენ, რათა სროლის პროვოცირება მოეხდინათ.

ჩრდილოეთ კორეამ საპასუხოდ 150-მდე ავტომატებით შეიარაღებული ჯარისკაცი გამოიყვანა, მაგრამ როდესაც დაინახეს მოწინააღმდეგის კოლოსალური ცეცხლოვანი ძალა, ისინი ადგილზე გაშეშდნენ და ხერხების ხმას ჩუმად უსმენდნენ.
ოპერაცია 42 წუთს გაგრძელდა. ხე წარმატებით მოიჭრა. არცერთი გასროლა არ მომხდარა. ეს იყო იშვიათი შემთხვევა, როდესაც აშშ-ის არმიის “DEFCON 3” დონის მზადყოფნა მხოლოდ ერთი მცენარის გასანადგურებლად გამოცხადდა. იმავე დღეს კიმ ირ სენმა იშვიათი ნაბიჯი გადადგა და მომხდარი ინციდენტის გამო “სინანული” გამოთქვა.

ხის მოჭრილი ნაწილი სუვენირებად დაამზადეს და ოპერაციის მონაწილეებს დაურიგეს.