ფრენკ ლუკასი: განგსტერი ჰარლემიდან, რომელმაც შეცვალა კრიმინალური სამყაროს კანონები

ნიუ-იორკი, 70-იანი წლები. ქალაქს ჰეროინის ეპიდემია კლავს, ქუჩებს კი იტალიური მაფია აკონტროლებს. და უცებ, არსაიდან ჩნდება ფრენკ ლუკასი, განგსტერი ჰარლემიდან, რომელმაც შეცვალა კრიმინალური სამყაროს ყველა დაუწერელი კანონი. მან შეძლო ის, რაც მანამდე წარმოუდგენელი იყო: თამაშიდან გათიშა შუამავლები და შექმნა იმპერია, რომელიც დღეში 1 მილიონ დოლარს გამოიმუშავებდა. პასუხი ვიეტნამის ომში და ეგრეთ წოდებულ „ლურჯ მაგიაში“ (Blue Magic) იმალებოდა.

სანამ სხვა დილერები იტალიური მაფიისგან ყიდულობდნენ გაზავებულ საქონელს, ლუკასმა გადაწყვიტა, პირდაპირ წყაროსთან მისულიყო. ის გაფრინდა ბანგკოკში და კავშირი დაამყარა „ოქროს სამკუთხედში“ მოქმედ ნარკობარონებთან, თუმცა მისი ყველაზე სკანდალური სქემა ტვირთის გადაზიდვას ეხებოდა. ვიეტნამის ომი მძვინვარებდა და ლუკასმა აშშ-ის არმიის კორუმპირებული სამხედროების დახმარებით შექმნა ე.წ. „გვამების კავშირი“. ლუკასი წლების განმავლობაში ამტკიცებდა, რომ ჰეროინს აშშ-ში დაღუპული ამერიკელი ჯარისკაცების ორმაგძირიან კუბოებში მალავდა. თუმცა, მისი პარტნიორები ამბობდნენ, რომ ისინი ნარკოტიკს ავეჯსა და ტექნიკაში მალავდნენ. ეს საკითხი დღემდე კამათის საგანია.

ქუჩაში გაყიდული საქონელი იმ დროს მხოლოდ 10-15% სისუფთავის იყო, დანარჩენი კი შაქარს ან ცარცს წარმოადგენდა. ლუკასმა ბაზარზე გამოიტანა ბრენდი “Blue Magic”, რომელიც 98-100%-იანი სისუფთავის იყო და ამით გაანადგურა კონკურენცია. იტალიურმა მაფიამაც კი დაიწყო მისგან საქონლის ყიდვა. ფრენკ ლუკასი გახდა პირველი აფროამერიკელი, რომელმაც კრიმინალურ იერარქიაში იტალიელებს გადაუსწრო.

ლუკასის იმპერია იმდენად დიდი იყო, რომ მას პოლიციის მთელი განყოფილებები ჰყავდა მოსყიდული. ნიუ-იორკის პოლიციის სპეციალური საგამოძიებო დანაყოფი ფაქტობრივად მის ხელფასზე იყო. ისინი იჭერდნენ ლუკასის კონკურენტებს და ბაზარს მისთვის ასუფთავებდნენ. მისი დაცემა კი მისმა ამპარტავნებამ გამოიწვია. ყოველთვის ჩრდილში ყოფნის მომხრე ლუკასი, მუჰამედ ალის ბრძოლაზე გამოცხადდა 50 000 დოლარად ღირებული შინშილას ქურქით და შესაბამისი ქუდით. სწორედ ამ მომენტში მიიქცია მან დეტექტივების ყურადღება.

1975 წელს ლუკასი დააკავეს და მას 70 წლიანი პატიმრობა ემუქრებოდა, თუმცა მან აქაც ივაჭრა. ფრენკი დათანხმდა თანამშრომლობას და გასცა ყველა, მათ შორის კორუმპირებული პოლიციელები. მისი ჩვენებების საფუძველზე 100-ზე მეტი ადამიანი გაასამართლეს, რის სანაცვლოდაც სასჯელი 5 წლამდე შეუმცირეს. ფრენკ ლუკასი ხშირად რომანტიზებულია ფილმებში, როგორც ჭკვიანი ბიზნესმენი, მაგრამ რეალურად მან გაანადგურა ათასობით სიცოცხლე „ლურჯი მაგიით“ და შესაძლოა შეურაცხყო დაღუპული ჯარისკაცების ხსოვნა.

როგორ ფიქრობთ, იყო ის გენიალური კრიმინალი თუ უბრალოდ დაუნდობელი მკვლელი, რომელმაც სისტემის სისუსტე გამოიყენა?