როკაპი – ალქაჯების მმართველი

როკაპი ქართულ მითოლოგიაში ალქაჯების მმართველია, რომელსაც ყველა ალქაჯი ემორჩილება და მის დავალებებს ასრულებს.

მითების თანახმად როკაპი ღმერთმა ტაბაკონზე ჩარჭობილ პალოზე მსხვილი ჯაჭვებით დააბა, პალო დედამიწის გულამდე აღწევს. როკაპი მუდამ ცდილობს პალოს ამოძრობას, დღენიადაგ არყევს პალოს და, ესესაა, უნდა ამოაძროს, რომ ამ დროს მოფრინდება ბოლოქანქარა ჩიტი, დააჯდება პალოს და როკაპის გასაჯავრებლად კუდის ქნევას მოყვება. გაჯავრებული როკაპი ხელს დასტაცებს უზარმაზარ უროს და რაც ძალი და ღონე აქვს დასცხებს აბეზარ ჩიტს. ჩიტი უმალ აფრინდება, ურო პალოს დაეცემა და კიდევ უფრო ღრმად ჩაარჭობს მიწაში. როკაპი თავიდან იწყებს პალოს მორყევას, კვლავ მოფრინდება ჩიტი, დააჯდება პალოს და ისევ ჩაარჭობს როკაპი პალოს თავისდა უნებურად ქვესკნელამდე. და ასე ხდება გამუდმებით. არ უწერია როკაპს თავის დახსნა.

როკაპის ისტორია ერთი ერთში ამირანის ისტორიას გავს, რომელიც კავკასიონზეა მიჯაჭვული.